O KAW BABAI, UNU IN HINANGUN MU... BANG KAW TAWAGUN SIN BANA MU

Kiyawajiban in hambuuk asawa amuin madtu pa bana niya bang siya tawagun niya. Subay da siya madtu pa bana niya misan unu pa in hihinang niya ha bay, misan pa awun iyaadjal niya subay niya ra hibien, pasalan labi mahalga in pagtawag kaniya sin bana niya. Subay di’ niya palugayun in pagsambag niya ha bana niya. Nagsabda in Rasulullah sallAllahu alayhi wa sallam: إذا دعا الرجل امرأته إلى فراشه فلم تأته فبات غضبان عليها لعنتها الملائكة حتى تصبح... “Bang in bana tawagun niya in asawa niya pa kulangan maubus di’ siya mabaya, sambil natuwg na sadja in bana niya sa’bu diyurugalan kaniya, la’natun siya sin mga malaikat sambil pa mahinaat...” Hangkanda subay kahatihan sin asawa in halga sin pagtawag sin bana niya kaniya, iban hatihun niya tuud misan unu pa in hinang niya subay niya hibien unu na man in kiyaligapan niya. Mautung da in Dugal sin Allahu Taala bang mga malaikat na in mangla’nat. Nasabbut halawm sin Qur-an in maksud sin pagpapanjari ha babai hasupaya kabaakan sin bana niya duun kaniya in kasanyangan. Bang in asawa amuin lumanggal ha maksud niya bang mayta siya piyapanjari na’ bunnal tuud way niya napajatu in atas-tanggungan niya ha bana niya, farman sin Allahu Taala: هو الذى خلقكم من نفس واحدة و جعل منها زوجها ليسكن اليها... “Siya (Allahu Taala) in Nagpapanjari kaniyu dayin ha hambuuk da ginhawa baran mahuli ampa Niya na isab piyapanjari in asawa niya hasupaya niya kaluwtan iban kapagpahumputan...”