IN KAHALAN SIN MGA BABAI SALEHAH

Nakatangis Hi Hadhrat A’ishah RadhiAllahu anha Hambuuk waktu, simandung pa pikilan hi Hadhrat Aa’ishah in Jahannam sarta’ nakatangis siya. Iyasubu siya sin Rasulullah sallallahu alayhi wa sallam bang unu in kiyatangisan niya, in sambung niya, “In kiyatangisan ku napikil-pikil ku in Jahannam. Unu ha Adlaw Aakhirat mapikil mu pa ka in mga ahli mu?” In sambung sin Nabi sallallahu alayhi wa sallam, “Awun tuw waktu di’ na mapikil sin tau in dugaing dayin ha baran niya: 1. Hika-isa bang in Mizan (timbangan) hipa alup na, ha waktu yaun, sahingga di’ pa kaingatan sin tau bang in Ammal niya mabu’gat ka atawa magaan; (2) in hikaruwa, bang in kitab-sin-kakahinang sin tau hi tukbal na kaniya, sahingga di’ niya kaingatan bang matabuk niya ka sin tuu lima niya;(3) in hikatuw, bang in taytayan Siraat hiklarun na pa Jahannam, sahingga maka-untas siya duun ha yaun lappas. (di’ tuud mapikil sin tau in dugaing dayn ha baran niya.)” Hi Habibah Adawiyyah Rahmatullahi alayha Kiyasuysuy, in hi Habibah Adawiyyah Rahmatullahi alayha bang siya maubus na magsambahayang Isha, putusun niya na in baran niya marayaw ampa siya sumakat pa taas atup sin bay niya. Didtu siya manginduwaa magtangis magsilawak pa Allahu Taala, “Ya Allah! in mga bituun masawa nagsisi’nag ha taas langit, in mga tau nahahaluk katan. In mga Sultan tiyapluk nila na in mga lawang-astana’ nila, sarta’ simuwd na sila pa mga bilik nila iban sin mga kalasahan nila (mga asawa nila). Na’ in aku, yari timindug ha hadarat Mu, Ya Allah, magpatikuwpu’ Kaymu.” Ubus ampa na siya tumagna’ magsambahayang Nawafil (Tahajjud iban kaibanan) sambil pa katihabaan sin duwm. Bang umabut na in Fajr. Manginduwaa na isab siya, “Limabay na in duwm, iban dumatung na isab in adlaw. Mabaya’ ku ingatun bang tiyayma’ Mu ra in ibadat ku ha duwm ini. Bang saupama tiyayma’ Mu, kuwgan tuud aku, bang saupama wala’, magdukka aku ha kalugian ku. Sapahan ku, ya Allah, ha Katinggihan Mu, di’ aku humundung mag-ibadat, misan pa aku hitulak Mu dayin ha lawang Mu pa malayu’, di’ da aku, mangda’-da’ iban masusa, sabab kiya-ingatan ku in ablang sin Kalabbiyan Mu iban Ka-ampunan Mu.” Hi Ujrah Rahmatullahi alayha Hi Ujrah Rahmatullahi alayha hambuuk babai-buta, sumaguwa’ magjaga siya ha katihabaan sin duwm mag-ibaadat, bang dumatung na in Fajr, manginduwaa na siya pa Allah, ha suwara haga-hagas, “Ya Rabbi ku , Ya Allah, baha mataud mga eepun mu bar-ibaadat (kausugan) namakay sin duwm ini ha pag ibaadatan ha katigidluman karna’ dumawhat supaya hadja makasuuk Kaymu, sarta’ naglulumba’-lumba’ sila katan ha paglugtu’ supaya makakawa’ Karayawan iban Kaampunan Mu. Ya Allah, Ikaw ra in pangayuan ku, wayna dugaing, lamura na aku dayn ha mga sila nakaliyu dayn ha kaibanan iban pasuwra na aku pa tampat sarayaw-dayaw ha Surga’. Ya Allah, angkata na aku pa darajat sin mga tau-landu’-kalasahan Mu, iban itunga na aku lamud dayn ha mga eepun Mu bar-ibadat. Ya Allah, Ikaw ra sa in labi sampurna’ in ulung dayin ha katan maulung, Ikaw in sampurna’ mataas dayin ha katan mataas in darajat, Ikaw in sampurna’ mahamura dayin ha katan mamura, Ya Allah, Ikaw ra sa in way tubtuban in Ni’mat, maulung na Kaw kaku’.” Ampa na siya sumujud pa Allahu Taala. In pagtangis niya karungugan sambil na sajja umabut in Fajr. Hi Sha’wanah Rahmatullahi alayha Hi Muhammad bin Mu’adh Rahmatullahi alayhi namayta’ awun hambuuk babai Saalihah in nagsuysuy kaniya: “Kiyakitaan ku ha taga-inup ku simuwd aku pa lawum Surga’, nakasuuk mayan aku pa lawang, kiyakitaan ku mataud manusiya’ natipun. Nangasubu aku, “Mayta’ kamu yan nagtipun dii ha lawang ini?” Hambuuk usug in simambung, ‘Awun babai in dumatung mari pa surga’, in mga tau ini nagpangari-ngari sin surga’ karna’ niya; sila ini in sumampang kaniya , maghatud kaniya pa lawum surga’.” Nangasubu aku bang hi siyu in babai pag-iyanun niya, in agi sin usug, “ Hi Sha’wanah Rahmatullahi alayha, hambuuk siya babai-maitum daraakun dayn ha hula’ Aikah. In agi ku, “Sapahan ku pa Allah! Taymanghud ku siya.” Wala’ da limugay, kiyakitaan ku na hi Sha’wanah dimatung. Ha taas siya unta’-babai-malingkat, limulupad ha taas aayan. Tiyawag ku in ngan niya sarta’ in agi ku, “Taymanghud ku kalasahan, kiya-ingatan mu in parsugpatan ta ruwa. Panginduwaahi aku pa Tuhan mu supaya kita makapag-unung.” Imuyum siya kaku’ in agi niya, “Wala’ pa dimatung in waktu makapagbunyug kaw iban aku. Sa’ taymaa in wasiyyat ku ini kaymu, tattap pagmasusahi in Aakhirat, pasinupa yan pa pangatayan mu, patayimbabawa in lasa mu pa Allah dayn ha katan kanapsuhan iban kabayaan mu, iban pagtagamahi in kamatay mu ha katan waktu.” Hambuuk Daraakun Salihah Rahmatullahi alayhi Hambuuk usug-saalih in nagsuysuy, “Hambuuk adlaw miyadtu aku iban sin daraakun ku pa tabu’. Didtu mayan kami, biniyn ku siya ha hambuuk tampat, in agi ku kaniya, “Magbalik da aku magtuy, lingkud hajja kaw dii, ayaw kaw manaw.” Sumaguwa’ pagbalik ku, bukun da malugay, wala’ na siya duun. Landu’ aku iyastulan, sambil minuwi’ aku diyudugalan. Pag-abut ku pa bay, yadtu na siya didtu ha bay. Kiyakitaan niya in pamayhuan ku diyudugalan, in agi niya, “Ya nakura’ ku, ayaw kaw mag-us-us dugalan. Dunguga naa aku. In bunnal niya, biniyn mu aku kaina ha tumpukan sin mga tau naliligap, way panumtum pa Allah. In kiyabugaan ku arakala tuwnun sila sin lupa’; sabab in tampat wayruun misan hambuuk tau nagzizikr pa Allah masuhul pagdatungan aramala iban musiba.” Na-ajayb aku ha himumungan niya, miyahardika’ ku siya magtuy. In agi niya kaku’, “Ya kaw nakura’ ku, bukun aadil in biyutang mu kaku’.” Naka-asubu aku kaniya, “Mayta’, biya’diin?” In sambung niya, “Ha waktu daraakun mu pa aku, duwa (in pahala’) in magka dawhat ku dayin ha Allahu Taala. Bihaun, miyahardika’ muna aku, in pahala’ ku hambuuk dakuman. In bayta’ sin Hadith, apabila in daraakun magtaat pa Allahu Taala sarta, magkhaddam pa nakura’ niya, lipat-magduwa in pahala’ sin ammal ibaadat niya” RAHLAH ABIDAH Rahmatullahi alayha Hi Hadhrat Ibrahim Khawwas Rahmatullahi alayhi nagsuysuy, “Hambuuk adlaw nanibaw kami kan Rahlah Aabidah Rahmatullahi alayha. Kiyapandugahan namu’ sabab sin kusug niya magpuasa miytum in gimpaisan niya. In siki niya napingka’. Magsambahayang siya naglilingkud. Sabab sin kusug niya magtangis pa Allahu Taala in mata niya nabuta. Didtu mayan kami naglingkud, nagwasiyyat kami tungud ha Rahmah iban Maghfirah sin Allahu Taala supaya ra mayan kulang-kulangan niya in pagmujahadah niya ha pag-ibaadat. Sumaguwa’ gam mayan, nagtangis siya, in agi niya “In panghati ku tungud sin kahalan ku, amusa in masakit ha pangatayan ku iban kiyabinsana’ sin nyawa ku. Marayaw pa sa wala’ naku piyag-anak.” Ampa na siya simambahayang. IN PAMUKAW SIN ASAWA HI HADHRAT HABIB - ABU MUHAMMAD AL-FAARISI Rahmatullahi alayhi Bang tunga’-duwm na, in asawa hi Hadhrat Habib Rahmatullahi alayhi mamukaw na kaniya, “Ya Habib, bati’ na kaw! Malayu’ sa in hula’ panawun ta, ampa tiyu’-tiyu’ pa in lutu’ ta, in tumpukan sin mga Bar-iman yadtu na nanuytuy miyuna, yari na kita kiyabiyn!” KAHALAN HI MUADHA Rahmatullahi alayhi Kiyasuysuy ha palihalan hi Muadha, bang sung na umabut in duwm, magkabtangan na siya, “Arakala dumatung na in kamatay katu’ niyu bihayaun.” Dayin ha yaun di’ siya magkaun bang duwm. Ha katihabaan sin duwm in hinang niya magsambahayang. SUYSUY SIN WALIALLAH DHUN NUN MISRI Rahmatullahi alayhi Nagsuysuy in WaliAllah Dhun Nun Misri, in agi niya “ Hambuuk duwm miyanaw aku, sambil naka-abut aku pa hambuuk lihak ha Kanaan. Didtu ha taasan sin tampat yaun awun kiyakitaan ku lambung biya’ lupa lambung manusiya’, imuurul kaku’ sarta’ nagbabassa Qur’an. Nagtatangis. Nakasuuk mayan, kiyapandugahan ku hambuuk tuwi’ yaun babai namamakay sin tamungun sin mga AwliyaAllah. Nagbibit-bit siya sili’. Iyasubu niya aku. “Hi siyu kaw yan?” Siyambungan ku siya. “In aku ini tau di’ kakilahan datung dayin ha dugaing hula’.” In agi niya, “Tuwan, mayta’ awun tau di’ kakilahan ha hadarat sin Allah?” Magtuy aku nakatangis ha kabtangan niya. Iyasubu niya aku, “Mayta’ kaw nagtangis?” In sambung ku, “Nakatabuk aku sin ubat mabisa ha sakit ku.” ANAK-BABAI HI IMAM AHMAD BIN HANBAL Rahmatullahi alayhima In anak-babai hi Imam ahmad bin Hanbal landu’ in tagi mag-ibadat. Ha duwm sin pagtiyaun kaniya, nagtahajjud siya sarta’ namassa pa siya pitu juz sin Qur’an duun ha yaun. KAHALAN HI HABIBAH Rahmatullahi alayhi Kiyabayta’ in kahalan hi Habibah. Bang siya magtunay sambahayang Isha’ didtu siya magtindug ha taas sin atup-bay niya. Duun ha yaun magpanginduwaa siya Pa Allahu Taala, “Ya Allah, timampal na in katan bituun, nahaluk na natuwg in katan manusiya’, in mga sultan iban mga nakura’ nagtapluk na sin lawang-bay nila, in tiyap-tiyap makasi yaun na nalipaga ha paglasa niya ha kalasahan niya. Na’ in kahalan ku Ya Allah ha hadarat mu bihayaun damikkiyan, magtunay sin paglasa ku Kaymu.” Ampa na siya mamuspusan magsambahayang. Bang maabut na in subu, in agi niya, “ Ya Allah nakalabay na isab in duwm yari na isab magdaratung in adlaw. Di’ ku kaingatan bang tiyayma’ Mu ra in duwm ini kaku’, dayin ha yaun magsarang-sukur aku Kaymu, arakala isab wala’ Mu tiyayma’ kaku’, dayin ha yaun magkarukkaan aku Sapahan ku ha Katinggihan Mu, manggayung-gung aku ha tiranan ini sakaynuhan ku masi buhi’. Bang saupama aku hi sabulak Mu dayin ha lawang Mu, di’ ku ra kagausan in lumayu’ dayin Kaymu sabab landu’ in mga karayawan amuin natabuk ku Dayin Kaymu.” -Dayin ha kitab "Ad-Dunya : Mata'-ul-Ghurur"