Maytah subay maghijab?
- pangajian
- Jul 11, 2017
- 3 min read
Matarrang ha lilayan nakauna in hijab bukun symbol sin Agama iban bukun luggiyah pangaddatan sadja, sagawah hambuuk salagguh-lagguh paldaakan sin Allahu Ta`ala pa manga kababaihan Muslimah iban sarayaw-rayaw pangaddatan amuin nagdara sin hikmat manyuk-nyuk iban kasanyangan sin Ummah Islamiyyah.
Bang in paghijab paldaakan sin Allahu Ta`ala subay tuud in kababaihan Muslimah tulus ihlas tumanggung sin kawajiban ini iban pagmakuyag sartah hitunay nila ha aturan iban ha hantang amuin siyukat kanila sin Sharah sin Agama Islam.
Palman sin Allahu Ta`ala:
وَمَا كَانَ لِمُؤْمِنٍ وَلَا مُؤْمِنَةٍ إِذَا قَضَى اللَّهُ وَرَسُولُهُ أَمْرًا أَنْ يَكُونَ لَهُمُ الْخِيَرَةُ مِنْ أَمْرِهِمْ وَمَنْ يَعْصِ اللَّهَ وَرَسُولَهُ فَقَدْ ضَلَّ ضَلَالًا مُبِينًا (سورة الأحزاب 36)
Iban bukun matup ha manga sila bar-iyman usug iban babai apabila awn hukuman (daakan) hibuntang sin Allahu Ta`ala iban sin Rasul Niya ha in kaawnan nila malling iban minih sin pakaradjaan kabayaan nila (bang hinangun nila atawa dih hinangun), iban hisiyu-siyu in magmahsiyat pa Allahu Ta`ala (dih magad ha kabayaan niya) iban sin Rasul Niya sabunnal tuud nalawng na siya sin lawng satarrang-tarrang. (Surah Al-Ahzaab: 36)
Bang natuh dung-dungan sin akkal sawasah in palman sin Allahu Ta`ala ha Surah An-Nour ayat 31, kabakan natuh in hikmat salagguh-lagguh in parakalah hijab.!
Muna-muna: Tiyawag sin Allahu Ta`ala in manga iypun niya kababaihan sin sataas-taas sipat amuin mapatut nila hipagbansag ha katan piyapanjari sin Mahasutsi Allah, amuna in sipat “IYMAN”
Ha palman niya Mahatinggi
[وَقُلْ لِلمُؤْمِنَاتِ]
“Iban pamungan (O Muhammad) ha manga Muhinaat (babai bar-iyman)”
Hika-duwa : Pagpuhpuh sin pangatud dayng ha hiyaram sin Allahu Ta`ala ha palman Niya;
[ يَغْضُضْنَ مِنْ أبْصَارِهنَّ ]
“Hibabah nila (puhpuun) in pangatud nila dayng ha hiyaram sin Allahu Ta`ala”.
Hika tuw: Pagpaliharah sin awrat dayng ha hiyaram sin Allahu Ta`ala ha palman Niya:
[ وَيَحْفَظْنَ فُرُوجَهُنَّ ]
“Iban parihalaun nila in awrat nila”.
Hika upat: Pagtabun sin lingkat amuin mahinang sabab hikalarak ha kapan sin Kawman Muslim, ha palman sin Allahu Ta`ala
[وَلَا يُبْدِينَ زِينَتَهُنَّ]
“Ayaw nila hipakitah in ari-ari (lingkat nila)”.
Hika lima: Piyanglangan in kignut kuhibal amuin hikalahil sin lingkat nila biyah sin hitandak in siki amuin sabab hika kagingkul sin gallang ha siki nila.
Ha Palman Niya:
[وَلَا يَضْرِبْنَ بِأَرْجُلِهِنَّ لِيُعْلَمَ مَا يُخْفِينَ مِنْ زِينَتِهِنَّ]
“Iban ayaw nila hitikarag in siki nila (bang mamanaw-panaw) ha maksud nila hasupaya kaingatan in ari-ari tiyatapuk nila (biyah sin sumagingsing in gallang ha siki nila amuin mahinang sabab mangdahi pa pitna)”
Hika unum: Siyabbut sin Allahu Tahala in paruntungan dakula’ ha hinapusan sin ayat ha palman niya:
[لَعَلَّكُمْ تُفْلِحُونَ ]
“Hasupaya madawhat niyu in salagguh-lagguh paruntungan”
Ha ayat ini, nakandut niya in maksud pagpanaug sin hukuman amuna in pagpaliharah sin awrat, iban nakandut niya in palsababan biyah na sin pagtabun sin lingkat iban pagpuhpuh sin pangatud iban panglangi ha subay tuud hitapuk in lingkat sin babai misan pa ha kignut kuhibal nila amuin manunjuki pa hikalahil sin lingkat nila. In manga nagkasabbut yan amuna in sataas-taas pangaddatan sin babai Muslimah amuin palsababan hikapaliharah sin kamaruhan niya iban hikapahgang sin pitna hasupaya in Kawman Muslim kumakkal halaum kasutsihan, kapan iban kasalamatan.
Wajib ha tiyap-tiyap nangangaku Muslimah sumambag sin wasihat sin Tuhan niya, iban Magtawbat dayng ha manga panulangi niya ha Sharah sin Tuhan niya Rabbul A-lameen hasupaya niya madawhat in paruntungan iban kasanyangan dunya iban ahirat ha palman sin Allahu Ta`ala:
[وَتُوبُوا إِلَى اللَّهِ جَمِيعاً أَيُّهَا الْمُؤْمِنُونَ لَعَلَّكُمْ تُفْلِحُونَ]
Iban pagtawbat kamu katan pa Allahu Ta`ala O kamu manga bar-iyman hasupaya niyu madawhat in paruntungan sangat dakula’ (Surah An-Noor: 31).
In damikkiyan paruntungan iban kapan amuin tiyatagama sin Allahu Ta`ala ha manga bar-iyman babai tartantu dih nila madawhat sahingga tamingan nila in katan ginhawa baran nila sin tamungun amuin hikapaliharah sin ginhawa baran nila dayng ha pangatud sin kausugan, iban hikahaun dayng hakapiligruhan sin pag Agama nila ha dih dumagbus in tamungun nila biyah sin tamungun sin babai way halgah sin ginhawa baran niya ha mahadjanah biyah sin tamungun masigpit iban manipis iban hawpuh.
In salagguh-agguh musiba dimatung pa Kawman Muslim amuna in simaplag in paghukas sin kababaihan sin ginhawa baran nila, amuna ini in maksud kabayaan sin manga Kapir iban Munapik iban sin manga Muslim pasik. Damikkiyan, amuna ini in kunsih dakulah amuin iyaangut sin manga kapir hasupaya majuljanah iban malarak in Agama Islam, iban makalayuh in manga Muslimin dayng ha panghinduh sin Agama nila, damikkiyan amuna in tiranan hikakansub sin hawa napsu sin manga tau pasik.
Palman sin Allahu Ta`ala:
[وَيُرِيدُ الَّذِينَ يَتَّبِعُونَ الشَّهَوَاتِ أَن تَمِيلُواْ مَيْلاً عَظِيماً]
Iban in kabayaan (miyumuhut) sin manga sila miyamagad ha panudluh sin shahwat nila amuin sumihah kamu makalayuh dayng ha Agama niyu sin layuh way irab-irabun (Surah An-Nisa 27).
Ampa in pagsihah (pagpalling) dayng ha Agama Islam mamattan siya apabila sumaplag in mahsiyat halaum Kawman Muslim amuin mangdahi pa manghalali ha manga hiyaram sin Allahu Ta`ala.([1])
______________________________________________
Follow my page:Black_beard
for more Islamic lectures/dawah
Σχόλια