MAYTA KITA PIYAPANJARI SIN ALLAH

19958882_1818614601801528_3703451666558062974_n

Muna-muna, in tiyap-tiyap tau asal tartantu bistahun ha palihalan sin katibuukan sin kabuhi’ niya, damikkiyan in tiyap-tiyap hangka-sasaat waktu amuin sangat-mahalga’ pagdaya sin manusiya’. Subay niya tuud jawabun in pangasubu: ha unu pakaradjaan mu piyakay in kabuhi’ mu? Unu in maksud mayta’ kita piyapanjari? Unu, awun ka malaggu’ maksud, atawa mahalga’ parkala’ ha pagpapanjari ha bangsa manusiya’?

Atawa, piyapanjari hadja sila ha wayruun maksud? Allahu Taala in dimihil banda’ ha manusiya’, in subay niya taymaun matutuud in kabuhi’. (di’ gaan-gaanun)

افحسبتم أنما خلقناكم عبثا و أنكم الينا لا ترجعون

Unu, pangannal niyu baha, in Pagpapanjari Namu kaniyu yan ula-ula ra (iban way kapusan), iban (kannal niyu) bunnal tuud di’ na kamu pabalikun Namu mari Kamu? Al-Mu’minun: 115

Damikkiyan, Allahu Taala, in nagsalassay ha dugaing ayat, sin maksud ha pagpapanjari sin kabubhi’: و ما خلقت الجن و الانس الا ليعبدون

Iban wala Ku piyapanjari in Jin iban manusiya ha karna’ sin unu-unu kamumpaatan muwi Kaku, buwat malayingkan piyapanjari Ku sila karna magtag-ipun sila Kaku in pag-ibadat nila Kaku in kamumpaatan niya kanila ra. Az-Zariyat: 56

Hangkan, in tiyap-tiyap tau subay niya dungdungan kitaun iban taliun bang pila na dayin ha mga sahalga’-halga’ waktu sin kabuhi’ niya in napakay niya ha maksud piyagpapanjarihan kaniya sin Allahu Taala—ha pagmujahada iban pagligsa’ bang biya’diin niya madawhat in maksud sin kabuhi’ niya—iban bang pila na dayin ha mga waktu niya in napakay ha mga pag-iyanun kalalagihan ha kabuhi’, iban ha paglibang-libang, iban ha kaibanan pakaradjaan amuin wayruun da parsugpatan pa maksud sin kabuhi’ niya.

Upama, nangdaak kaw tau maghinang duun kaymu.Tantu sadja jagahan mu in waktu pakayun niya ha paghinang niya iban na sin waktu pakayun niya ha paghali-hali, pagsiga, atawa pag-inum-inum. Bihadtu ra isab, subay magsibu’ in kabayaan mu hinangun sin tau diyaak mu, iban sin unu in subay hinangun mu pa nakura’ mu. Atawa, upama, awun tau naghinang ha tinda mu amuin paggadjihan mu ha tupungan sin hinang niya. Bang siya madaran wala’ duun, yadtu hadja naghinang ha bay niya, sarta’ maghinang ha tinda mu hangkarayi’ da, unu bayaan ka kaw dumihil kaniyu gadji-jukup?

Bang di’, na’ unu baha’ in hika da-awa mu ha hadarat sin Allahu Taala tungud ha mga laku-laku mu ha palihalan sin mga pardaakan Niya, amuin nagpapanjari kaymu supaya kaw tattap mag-Taat Kaniya. Siya in Rabb mu iban Nagpapanjari kaymu, nagbu’sug kaymu sin jinisan Ni’mat ha katan masa, sumagawa’ iyuppas mu isab in waktu mu ha mga parkala’ way-puws paidda, diyupang mu in baran mu ha pangahagad bat in pagsambahayang mu mamarahi na. Tali-a kunu’ bang kaw mabaya’ tumabuk sambung iban jawab biya’ hayan dayin ha mga daraakun mu?

Sabunnal Ulung iban Rahmat sin Allahu Taala katu’ niyu in wala’ niya piya-wajib katu’ in subay natu’ hibugsu’ in katan waktu iban masa natu’ pa pag-ibadat Kaniya. Diyaak Niya hadja kita niyu’ tumukbal hangtingi’ sin waktu natu’ ha maksud yaun. Bukun ka kita niyu tau-anyaya, sabab sin mapahil iban mapasad kita niyu’ ha mga kawajiban natu’ Kaniya?