IN ASAWA KU HALAWM SIN SULGA

19961638_1818080735188248_1762224498322129055_n

Hi Shaikh Abdul Wahid Ibni Zaid Rahmatullahi alayhi hambuuk bantug WaliAllah, nagsuysuy siya, “Tuw dum naglangkit nanginduwaa aku pa Allahu Taala mabaya’ ku kitaun in babai mahinang ku asawa ha lawum surga’. Puas sin tuw adlaw, biyukisan kaku’ in parkala’, in ma asawa ku didtu hambuuk babai dayin ha Habasa, Maimunah Saudaa in ngan niya, sabab landu’ maitum in gimpaisan niya. Nanginduwaa aku bang hawnu ku siya kabaakan, biyukisan da isab kaku’ in hula’ iban liyuuran niya ha Kufah. Miyadtu aku pa Kufah, pag abut ku madtu nangasubu aku bang hawnu ku siya kabaakan. Kiyabaytaan aku didtu siya naghuhula’ ha hambuuk gulangan nag iipat siya mga kambing. Miyadtu da isab aku pa gulangan, didtu hadtu, kiyakitaan ku siya nagsasambahayang sunnat, in tamungun niya daan tiyutupakan. In ha raig niya kimakaun sagbut in mga kambing niya sarta’ nagdaraig iban mga iru’ talun. Simuuk man aku kaniya, iyus-usan niya in sambahayang niya. Pag ubus niya nagsambahayang, namissara siya kaku’, siyabbut niya in ngan ku, agi niya, “Abdul Wahid marayaw pa kaw muwi’ na magbalik, sabab in janji’ sin Allahu Taala papaghambuukun kita kunsum (ha Adlaw Qiyamat).” Nangasubu aku kaniya, agi ku “Bang man kaw kaulungan sin Allahu Taala, mayta’ mu kiyaingatan in ngan ku?” Sambung niya, “Mayta’ wala’ mu kiya ingatan in mga Ruh bakas natitipun katan (ha panagnaan sin pagpapanjari). In mga sila nag-ingati na ha waktu yadtu sambil mari pa dunya manuytuy magbagay.” (Bihaini in madaran magkasabbut ha hadith). Simukat aku kaniya miki naseehat. In agi niya, “Maka inu inu sa yan, ikaw in magpangdihil waseeyat ha mga tau, ubus bihaun mangayu’ kaw kaku’ naseehat.” Giyanapan niya in kabtangan niya, agi niya, “Bakas ku kiyadungugan dayin ha mga nakagulang, agi nila, “ Hi siyu siyu tau in kiyarihilan sin Allahu Taala pangalta’ ubus masi masi pa siya magmuhut pataurun (wayruun kamararahi niya) tiksaun siya sin Allahu Taala dayin ha kasi lasa pagmunajat iban Allah, iban in tau bihan asal asal masuuk pa Allah siksaun siya sin kalayu’ dayin ha Allahu Taala. Ampa siya namissara upat kabtangan, laung niya, “Ya Kaw mananawag-tawag pa kaibanan tau, magsasakat mimbar magkhutba, iban magdirihil banda’ supaya in mga tau di’ mahulug pa dusa, wala’ mu ka kiyakitaan in pikilan mu taga sakit, mabaya’ na sumuuk pa dusa. In angan angan ku napabuntul muna in baran mu iban nakapagtawbat na kaw muna dayin sin pagsakat mu pa taas mimbar sabab bang yan nahinang mu in mga kabtangan mu suminup pa mga pangatayan nila. Sumagawa’ bang mu sila daakun tuminggal sin parkala’ hihinang mu, di’ nila kaw dungugun. Iyasubu ku siya, mayta’ in bili bili mu masanyang in pagbunyug iban iru’ talun?” Agi niya ”Ayaw na kaw magsusa kanila, sabab masanyang in parsugpatan ku iban Tuhan ku, hangkan masanyang in parsugpatan nila. (Raudh)